8. KONGREYA PARTÎYA MAF Û AZADÎYÊ HAKPAR YA AMEDÊ DE SER NAVÊ PDK – BAKÛR AXAFTINA BERDEVKÊ PARTIYA ME BIRÊZ HEMÎDÊ SMAÎLAXA

04.05.2018

Kongreya Bajarê Diyarbekir Ya Partiya Maf û Azadiyan HAK-PARê.

Beşdarên granbuha ev dem û hemî demên we xweş bin.

Kongreya we di demeke ku li her aliyê welatê me, Miletê Kurd û hemî Kurdistanîyên cînişên Kurdistanê tûşî êş û azarên gran dibin de, pêk tê.

Di gel ku Kongreya we li Bajarê kevnar li Diyarbekrê pêk tê jî lê belê li hemberî van rûdan û berfirehbûnan mirov dibêje belkî axa miriya li ser Bakurê welatê me hatibe bêjingkirin, bêdengiyeke mezîn xwe berdaye ser tevaya hêz û rêxîstînên Bakur. Desthilatdariya dagirker, ji avabûna vê komara bêserûber heta nuha polîtîkaya xwe ya tunekirin û tune lı qelemê dana Kurd û Kurdistanê ji rojeva xwe dernexistiye. Ji destpêka avakirina vê komarê ve, Kurdistanî her di nav rewşeke awarte de dijîn, lê dubare bi navê reşa awarte, ew kurtêlên demokrasiya bejik jî, bi carekê ji ortê hatine rakirin. Ne bi tenê di nava tixûbê dîyarkirî de, Dagirkerên Bakurê Kurdistanê, Dewleta Tirk, li derveyî sînorên xwe jî, li hemberî her cûrê bidesxistin û pêkhatinên Kurd û Kurdistanê, dujminayiyeke kesnedî daye ber xwe, bê perwa, bi tevaya hêz û karîna xwe agir dibarîne.

Duhî, li hemberî giştpirsiya li Başûrê Kurdistanê, bi dagirkerên li Tehran û Bexdayê re tevdigeriyan, îro jî li Rojavayê Kurdistanê, êrîşî tevaya şaneyên Kurdistanî dike. Sibe li ser heyvê jî guman û hêviyeke Kurd-Kurdistaniyan ya hin bidestxistinan peyda bibe, bê guman dê êrîşî wan jî bike.

Dil dixwest, di vê derfeta axaftinê de, em li ser pirsên çareseriyê, li ser kelecana 25ê Îlonê rawestin, wê şîrove bikin, dersan jê derxînin.

Di 25ê Îlonê de Kurdan li Başûrê Kurdistanê û heta bi Kurdên li dijî serbixwebûnê di nav de dîrok xemîlandin. Di dîroka Kurdistanê de Kurdan cara yekê ku pirraniya nêzî tevaya Kurdistaniyan, dilxwaz û dildarên serbixwebûnê, di konsensuseke neteweyî de pêk hatin, li hev kirin, bi yekdengî, di bin çavdêriya pisporên navneteweyî de, bi dengdaneke bi serfîrazî, giştpirsiyeke hevdem pêk anîn. Ji sedî nodûsisiyên Kurdistaniyan bi dengê erê tapoya welatê xwe, welatê bav û kalan, Tapoya Başûrê Kurdistanê raberî raya giştî ya cîhanê kirin.

Mixabin di berbanga serbixwebûnê de, hin rûdanên ku kesî hêvî nedikir rû dan. Ji we hêjayan teva diyar e ku di dîroka Kurdistanê de, xiyaneteke herî mezin û dijwar pêk hat. Kerkûk û gelek deverên bi xwîna pêşmergeyên dîlşêr hatibûn rizkargirin, radestî dujminan bû.

Beşdarên hêja! Em bi hûrbînî li ser vê yekê rawestin û tevaya karîn û zanîna xwe li çawayî û çendayiyên vê îxanetê xerç bikin, tirsa mezin ew e ku em dê erk û berpirsiyariyên xwe yên neteweyî, di bin bandora vê xiyanetê de ji bîr bikin û bi tenê bi gilî û gazinan dakevin.

Belê divê em rûreşîya hatiye kirin ji bîr nekin, lê di heman demê de, bidin zanîn, têbikoşin ku ew GIŞTPIRSÎ rast e belgeya rêya serbixwebûna welêt e.

Li Rojhilatê Kurdistanê cengawer û canbêzarên Kurd, li hemberî desthilatdariya nijadperestan, ji bo doza xwe ya pîroz sînga xwe kirine sîper, ji nû ve hilkişiyane çiyayên Kurdistanê. Hêvî ji çiyayan bilindtir kirine. Li şûna darizandin, dadkirinên bê serûber, bi sedan li sêdarê bihêne dan, Pêşmergeyên Rojhilatê, ji mirinê re dilîrînin.

Wa ye li Rojavayê Kurdistanê her ew senaryoya firotina Kurdistanê bi rengekî din di rojevê de tê bicîhkirin. Bi navê Kurd û Kurdistaniyan qaşo li hemberî êrîşên Dewleta Tirk, Dagirkerên li Şamê weke xelaskerên pîroz têne xemilandin û pêşkêşî dunyayê, tê kirin. Ne bi tenê hêzên dagirker yên ser bi desthilatdariya Îranê ve her weha ew hêzên dagirkerên Kerkûkê, yên şîa, yên Heşda şîî wek leşkerên pîroz ku di hawara kurdistanê de hatine, pêşkêşî gelê me û cîhanê tê kirin.

Gelî Ciwanik û Ciwamêran, beşdar û birêvebirên Kongreyê, barê neteweyî barekî gran e, belê hêvî ji tevaya astengiyan bilindtir e. Weke bavê mezîn Mustafa Barzanî gotiye: di şkestinan de bêhêvî bûyin û di biserketinan de ji ser xwe çuyin divê di deftera me de cîh negire.

Naskirina nexweşiyê nêviyê dermankirinê ye. Di vê tevliheviya mezin de, pêdivî û pêwîstiya Miletê Kurd bi hevgirtinê û pevxistina hestên neteweyî ji hemî demê bêtir e. Bi taybetî mejiyê teze, xebata cwanan, di tekoşîna rizgariyê de, çaresaz e, pêwîst e, bibênebê ye.

Bi hêviya ku axa miriyan ya bi ser Bakurê Kurdistanê ve hatiye dakirin, bi herife û bi hêviya ku em bi hev re xurttir in bibe dûrişma hemî hêz û kesayetiyên Kurdistanê yên Kurdistanî, Kongreya we ji dil Pîroz dikim.

Biserketin her para Kurd û Kurdistaniyan be

Bijî Pêşmerge!

Bijî Serbixwebûn

Her bijî Kurd û Kurdistan​

Hemîdê Smaîlaxa, Diyarbekir

PDK-BAKUR