Skip to content Skip to left sidebar Skip to right sidebar Skip to footer

DAXÛYANÎ

HEVKARÎ – FRANCE

HEVKARÎ

FRANCE

Hevbenda Partiyên Siyasî yên Kurd li Fransa

RAGEHANDIN

EM ÊRÎŞÊN MÛŞEKÎ YÊN REJÎMA KOMARA ÎSLAMÎ YA ÎRANÊ LI DIJÎ BAREGEHÊN PARTIYA KOMELAYA ŞOREŞGER A KURDISTANA ÎRANÊ BI TUNDÎ ŞERMEZAR DIKIN

 

Li gorî agahiyên dawî, ev êrîşan bûne sedema ku gelek pêşmerge û çalakvanên Kurd şehîd bibin û gelek kesên din jî birîndar bibin.

Ev êrîş binpêkirineke eşkere ya serweriya Iraqê û Herêma Kurdistanê ye, û her weha binpêkirina cidî ya mafê navneteweyî ye.

Em piştgirî û hevgirtina xwe bi malbatên şehîdan, birîndaran û hemû gelê Kurd re radigihînin. Em sersaxiya xwe pêşkêşî malbatên şehîdan dikin û ji bo birîndaran saxbûna zû dixwazin.

HEVKARÎ Fransa gazî Neteweyên Yekbûyî, Yekîtiya Ewropayê, hikûmeta Iraqê, Hikûmeta Herêma Kurdistanê û hemû rêxistinên mafên mirovan dike ku van êrîşan bi eşkereyî şermezar bikin û gavên pratîk bavêjin da ku dawî li van destdirêjiyan bînin.

Her weha em bang li hemû diasporaya Kurd û hêzên demokratîk dikin ku yekbûna xwe bihêztir bikin û bi çalakiyên demokratîk van sûcên rejîma Îranê eşkere bikin û raya giştî ya navneteweyî agahdar bikin.

Bêdengiya civaka navneteweyî tenê dibe sedema berdewamkirina van êrîşan.

Dema wî hatiye ku gavên cidî û berçav werin avêtin.

 

Parîs, 17ê tîrmeha 2026

 

Partiyên îmzeker

Partiya Welatparêzên Kurdistanê (PWK)

Partiya Demokrata Kurdistanê – Rojhilat (PDK-I)

Partiya Maf û Azadiyan (HAK-PAR)

Partiya Sosyalîstên Kurdistanê (PSK)

Partiya Komunîsta Kurdistanê – Başûr (KCP)

Partiya Yekîtî ya Demokrat ya Kurd li Sûrya (PYDKS)

Zahmetkêşan Rojhilat

Partiya Demokrata Kurdistanê (PDK)

Partî Dîmokratî Pêşverû Kurd li Sûrya (P.D.P.K.S)

Partiya Demokrata Kurdistanê (PDK-Bakur)

 

BO RAYA GIŞTÎ YA KURDISTANÊ

PDK-BAKUR, DI 61EMÎN SALVEGERA DAMEZRANDINA XWE DE CAREKE DIN JI RAYA GIŞTÎ RE RAGIHAND KU, BI HÊZ Û BAWERIYA XWE YA KU JI SEÎD ELÇÎ Û HEVDOZÊN WÎ WEK MÎRATEYEKÊ XETA TEKOŞÎNÊ YA KURDISTANÎ JI ME RE MAYE, TÊKOŞÎNA XWE BI HEMAN BIRYARDARIYÊ DIMEŞÎNE

Partiya me PDK-Bakur, 61emîn Salvegera Damezrandina xwe, di 11e Tîrmeha sala 2026an de, bi bernameyeke Rêveberiya PDK-Bakur amadekirî, li Demir Hotelê ya li Amedê, bi eleqe û beşdariyeke mezin pîroz kir.

Di bernameyê de, endam û dilsozên partiyê yên ku ji sê nifşên têkoşîna siyasî ya Kurdistanê pêk hatibûn, nûner û berdevkên siyaseta Kurdistanî yên ji çar beşên welêt, berdevkên hêja yên dam û dezgehên Kurd, ji Tevgera Vejînê Ya Kurdistanê birêz Ferîd Azad û hevdozên Vejînê, ji Partiya Însan û Azadiyê (PÎA) birêz Evdila Bozkuş, Ji Însiyatîfa Netewî Ya Kurd rêzdar Berfîn Xan,  siyasetmedar û rewşenbîrê naskirî, endamê PÊLKURDê birêz Fûad Onen, berdevkê CNKyê birêz Jiyan Tîmûrtaş, ji Weqfa Ismaîl Beşîkcîyî, nivîskar-lêkolîner birêz Seîd Veroj, nivîskar Elî Fikrî Işik, mûzîkjenê Kurd yê navdar birêz Brader Musîqî, birêz Ehmed Kanî û gelek siyasetmedar, nûser, roşinbîr û endamên çapemeniyê beşdar bûn. 61emîn Salvegera Damezrandina PDK-Bakur, di bala çapemeniyê de jî bû.

Di 61emîn Salvegera Damezrandina PDK-Bakur de bi danîşana sînevîzyonê re, rêz li şehîdên doza Kurdistanê û partiya me, hate girtin. Pê re jî, Sirûda Neteweyî Ey Reqîb hate xwendin. Daxûyaniya 61emîn Salvegera Damezrandinê ya PDK-Bakur û nexşerêya partiyê, ji aliyê endamê Komîteya Navendî ya partiyê, birêz Mistefa Konukî ve bi zimanê dayîkê hate pêşkêşkirin. Di daxûyanî de bi kurtasî, ev mijarên girîng derketin pêş: “Damezrandina PDKTyê ya di sala 1965an de, li Bakurê Kurdistanê, ji bo bi sazîkirina siyaseta hevdem ya Kurdistanî, pengaveke dîrokî ye. Seîd Elçî, Faîq Bûcak û hevdozên wan, pirsgirêka Kurdan ji çarçoveya mafên çandî û reformên îdarî derêxistin û arîşeyê wekî doza Kurdistanê pênase kirin û hîmên xeta siyasî ya Kurdistanî ya ku wek rêbaz hebûna neteweyî ya Kurdan, welatê wan yê dîrokî û mafên neteweyî yên jêneger danîbûn ber xwe, avêtin. PDK-Bakur peyhatiya vê xeta hiqûqî, dîrokî û siyasî ye û têkoşîna xwe li ser heman prensîbên bingehîn didomîne. Yek ji referansa sereke ya ku bingeha îdeolojîk a partiya me pêk tîne, xeta siyasî ya Kurdistanî ye ya ku bi têkoşîn û paşxaneya Mela Mistefa Barzanîyê nemir şênber bûye. Ev xeta ku têkoşîna dij-kolonyalîst û demokratîk temsîl dike, çar beşên Kurdistanê wekî yek welatê dîrokî, neteweya Kurd jî wekî yek neteweyî qebûl dike û mafên neteweyî di ser hemû hisabên siyasî û demkî re digire.PDK-Bakur vê xetê ne bi tenê wek mîrateke dîrokî, berevajî vê wek referanseke sereke a siyasî ya ku îro ro jî rêya me ronî dike, dipejirîne. Ev xeta ku têkoşîna dij-kolonyalîst û demokratîk temsîl dike, çar paçeyên Kurdistanê wekî yek welatê dîrokî, neteweya Kurd jî wekî yek neteweyî qebûl dike û mafên neteweyî di ser hemû hisabên siyasî û demkî re digire.” Daxûyaniya 61emîn Salvegera Damezrandina PDK-Bakur, li endamên çapemeniyê û li hemî beşdaran hat belavkirin.

Her weha, di bernameyê de “Xelatên Rûmetê Yên Şehîd Seîd Elçî” jî, li xelatgirên hêja hatin pêşkêşkirin.

Ji kedkarên partiya me birêz Arif Sûmerkan (Mele Arif), birêz Keyfxusran Demîr ve birêz Mihemed Konuk, bi boneya Rêûresma Xelatê û Bernameyê, axaftinên xwe kirin. Endamê KNyê ya Partiya me Qasim Îçlî, geşedanên di derbarê partiya me de, agahiyên girîng dan çapemeniyê.

JI BO RAYA GIŞTÎ

PDK-Bakur,  êrişa li ser mala serokê Herêma Kurdistanê birêz Nêçîrvan Barzanî hatîye kirin bi tundî şermezar dike. Eve ne cara yekem e ku Îran û alîgirên xwe yên derveyî yasayî li Îraqê bi dron û mûşekan êrişî Kurdistanê dikin.Li gel ku herêma Kurdistanê ne teref e di şerê navbera Amerika-Îsraîl û Îranê de, û Kurdistan her dem aligirê aşîtiyê ye, lê dîsa jî dibe armanca êrîşên Îranê û alîgirên wê yên li Îraqê. Îranê roja 24ê adarê bi mûşekan êrîş bir ser xaleke Pêşmerge û di encam de 6 Pêşmerge şehîd ketin û 30 Pêşmerge jî birîndar bûn. Êrîşên Îranê û alîgirên wê yên li Îraqê xeternak in. Parastina tevaya Herêma Kurdistanê berpirsîyarîya hikûmeta federal ya Îraqê ye, lê mixabin ev berpirsîyarî nehatîye bicîhkirin bi taybet li dij komên terorîst yên li Îraqê. PDK-Bakur van êrîşên dijminane yên li dijî Herêma Kurdistanê bi tundî şermezar dike.

Bijî Pêşmerge û Bijî Kurdistan!

PDK-Bakur

SERSAXÎ (NECAT ONUR)

Em bi xemgînî radigihînin ku endamê hêja yê partiya me Necat Onur yê xelqê Cizîra Botan çû ser dilovanîya xwe. Ew jiyananeka bi kurdewarî û welatperwerîyê têr û tije derbas kir û bi serbilindî ji cîhanê koç kir. Ew ê hertim di bîra me de be.

 

PDK-Bakur

SERSAXÎ – KAK IDRÎS (EVDIREHÎM YAWÛZ)

Heval û hogirê me yê bi salan, endamê Partiya me PDK-BAKUR, KAK IDRÎS (EVDIREHÎM YAWÛZ), li Rihayê koça xwe a dawîn kir. Kak Idrîs, wek xemxûrekî welêt, di sala 1977an de li Cizîra Botan tevlî refên Partiyê bibû ku di tevahiya jiyana xwe de her tim ji bo Kurd û Kurdistanê heya roja dawîn jî bê rawestan kar kiribû. Em wek PDK-Bakur, sersaxiyê li endamên malbata wî, li endamên Partiyê û hemû hezkiriyên wî dikin. PDK-BAKUR li niştimanperwerî û têkoşeriya wî ya ku ji bo me wek mîrateyekê ye, dê heya serxwebûna Kurdistanê xwedî derkeve. Xwedê rehma xwe lê bike, cihî wî bihûşta rengîn be.

PDK-Bakur

59 SALIYA PDK-BAKUR LI GELÊ KURD Û KURDISTANÊ PÎROZ BE

PDKT, 59 sal berê di 11ê Tîrmeha 1965an de hat damezrandin.

Partiya Demokrat a Kurdistanê ya Tirkiyeyê (PDKT)di 11ê Tîrmeha 1965an de li bajarê Amedê, navenda welatê me, hat damezrandin. Yekemîn damezrênerên Partiya me şehîd Seîd Elçî, nemir Şerafedîn Elçî û Omer Turhan, Derwêşê Sado (Derviş Akgûl) û Şakir Epozdemîr bûn. Piştî damezrandina wê, bi hewldana nemir Fehmî Bîlal sekreterê Şêx Seîd Efendî ku di damezrandina partiyê de roleke aktîf hebû, Faîk Bucak bi merasima sondxwarinê ya ku li Otela Tûrîstîk a Diyarbekirê hat lidarxistin, wek Serokê PDKTyê hat destnîşankirin.

Piştî Komkujiya Dêrsimê ya 1938an û Doza 49an û piştî derbeya leşkerî ya 1960î Partîya me ya ku 11ê Tîrmeha 1965an de hat damezrandin yekemîn partiya siyasî ya netewî ya Kurdistanê ku di qada siyasî de cihê xwe girt.

PDKT partiyeke demokratîk a navendî bû ku li Bakur pêwîstiya rêxistinbûneke cuda derxist pêş û mafên neteweyî û demokratîk parast.

Beriya ku partiya me sala yekem a damezrandina xwe temam bike, hêzên k

ûr ên dewletê serokê me parêzer Faîk Bucak di encama sûîqesteke siyasî de qetil kirin. Piştre serokê nû yê partiya me Seîd Elçî, di sala 1967’an de hat girtin û piştî 70 roj lêpirsîna bi îşkenceyê hat sirgûnkirin. Tevî van hemû neyînîyan partiya me li herêmên wek Amed, Farqîn, Êlih, Botan, Sason, Xerzan, Baykan, Bedlîs, Sêrt, Tetwan, Mûş, Bulanik (Kop), Licê, Patnos, Wan, Hîzan, Siwêreg, Cizîr, Nisêbîn û Qoser. Li Enqere û Ewropayê nûnerên xwe destnîşan kirin.

Di Hezîrana 1971ê de Seroke Giştî yê PDKT Seîd Elçî bi Mihemedê Begê re di encama sûîqesteke siyasî de hat qatilkirin û şehîd bû. Ev derba duyemîn bû li partiya me. Tevî hemû zehmetiyan jî Partiya me bi zanebûna erk û berpirsyariyên xwe yên Kurdistanî tevdigeriya.

Em, partiyeke netewî û demokratîk in. Partiya me modern e û nirxên gelê me dihewîne.

Têkoşîna sivîl, demokratîk û aştiyane ya ku pêwîstiya gelê Kurd heye wê ji bo daxwaz û daxwazên gelê me şert û mercên pêwîst biafirîne. Di xebatên siyasî û rêxistinî de hêz û tundiyê bi temamî red dike.

-Di Îlona 1992 de, Partiya Demokrat  a Kurdistana Tirkiyeyê (TKDP) ku di sala 1965an de hat damezrandin, Platforma Yekitiya Ala Rizgarî, Platforma Yekîtiya Netewî (Bergeh), koma ku ji Rizgarî derket û hin kadroyên serbixwe, di Kongreya Yekîtiyê ya ku li dar xist de bûn yek.

-Di Kongreya a ku di Mijdara 1994an de hat lidarxistin, navê Partiyê li ser pênaseya erdnîgariya siyasî bû Partiya Demokrat a Kurdistan – Bakur (PDK-Bakur).

-PDK-Bakur sîwana welatparêziya Kurdewarî û Kurdayetiyê ye. Di bin vî banî de refên me ji hemû Kurdan re vekirîne. Em amade ne ku bi hev re xizmeta gelê xwe bikin.

Partiya me ku di sala 1965’an de hatiye damezrandin, xwedî dîrokeke dirêj a têkoşîn û mîsyonê ye. Partiya me di nava tevgera demokratîk a neteweyî de xwedî cihekî girîng e. Em bang li gelê xwe dikin ku di nava refên partiya xwe de bicivin û têbikoşin.

-Bi boneya 59’emîn salvegera damezrandina PDK-Bakur em, pêşengên xwe yên wek Şehîd Faîk Bucak, Seîd Elçî û hemû şehîdên Partiyê bi minet û rêzdarî bi bîr tînin. Rehma Xwedê li hemû şehîdên Kurdistanê be.

11.07.2024

PÊNCÎ Û YEKEMÎN SALVEGERA KOÇKIRINA SEROK SEÎD ELÇÎ

Wek PDK-Bakur, em avakar û serokê partiya me Seîd Elçîyê pakrewan, di pêncî û yekemîn salvegera koçkirina wî de bi hestên şoreşgerane bi bîr tînin. Xemxûr û têkoşerê gelê Kurd Seîd Elçî, yê ku her tim di rêya serxwebûna welatê xwe de ji bo azadiya gelê xwe têkoşiya, bi bîr û baweriya xwe ya hêzdar, rêya me a dirêj a ji bo serxwebûnê ronî kir. Dilsozîya wî, ked û kespa wî ya bêhempa û a nayjibîrkirin, ji bo me PDK-Bakurîyan bû nexşerêyeke têkûz û sermedî.

Şehîd namirin!

Bijî Kurd û Kurdistan!

Bijî PDK-Bakur!

DAXÛYANÎ JI RAYA GIŞTÎ RE!

Demek dirêj e ku di navbera alîyên PDK-Bakur de li ser esasê pêkanîna yekîtîya rêxistinî ya partiyê dan û stendin berdewam bû. Cihê kêfxweşî û şanazîyê ye ku îro ev pêvajo gihaye qonaxek bilind, û biryarayekîtiyê hatiye standin.

Rayedar û alîgirên du alîyên PDK-Bakur,gihane wê bîr û rayêku divê PDK-Bakur di demek nêzîk deyekîtîya xwe ya rêxistinî pêk bîne û bi kongreyek giştî vê yekîtiyê mîsoger bike.

Em her du alîyên PDK Bakur, gihaştine wê bîr û rayê ku divê PDK-Bakur bi siyasetek serbixwe û bi berpirsiyarîyek neteweyî û Kurdistanî, bi destpêk û rûpelek nû xwe bîne ser hev û bi xebata xwe hêvîyên gelê bakurê Kurdistanê û tevgera azadîxwaza miletê Kurd geştir û xurttir bike.

Em hewl didin û dixwazin bi kongreyek giştî hemî kes û alîyên ku xwedî li mîrata PDKT ya 1965an û hetanî îro derdikevin bînin cem hev û bi Partiyeke xurt ruh û giyanê kedkar û cangorîyên PDK-Bakur şad bikin. Em vê helwestê wekî gaveke dîrokî bi nav dikin.

Eşkere ye ku dema burî zirarek mezin da PDK Bakur û tevgera sîyasîbi şêweyek gistî. Lewra, bi navê her du alîyên PDK Bakur, em xwe wek yek ji şirîkên lawazkirin, hêvîşikandin û bê alternatîf hîştina bakurê Kurdistanê dibînin û bêyî ku terefekî din gunehbar bikin, lêborîna xwe ji miletê Kurd dixwazin.

Hêjayê gotinê ye ku, alîyekî PDK-Bakur li gel hemî şêweyên peywendî, daxwaz û bangên me, mixabin ku di derbarê mijara yekîtîyê de tu bersivek fermî dîyar nekirîyê û di heyva nîsana 2024an de bi logoyek cûda daxûyanîyek belav kirîye.

Banga me li hemû kedkar û alîgirên ku li mîrata PDK-Bakur xwedî derdikevin ev e:

Werin em bi hev re ji vê rewşa aloz a li bakurê Kurdistanê re bibin derman. Em bi hev re rêxistin û sîyaseta PDK-Bakur xurttir bikin û doza neteweyî li bakurê welatê xwe bihêztir bikin.

4 Gulan 2024

Komîteya Yekîtîya PDK-Bakur

Partîya Demokrata Kurdistan – Bakur

PIRS Û PIRSGIRÊKÊN DEMOKRATÎKKIRINA TIRKÎYEYÊ BÛYE BAR Û KETIYE SER MILÊN VÎ GELÎ!

27.03.2023

Partiya me PDK-BAKUR, di rêkeftî 07.01.2019an de li jêr sernavê “Siyaseta Tırkîyeperwer Bi Yekitiyê Diçe Helbijartinên Herêmî” daxuyaniyek belav kiribû (bnr. PDK-Bakur Info, Türkiyeci Siyaset Yerel Seçimlere İttifakla Giriyor, 10.01.2019), di vê daxuyaniyê de amaje pê dikir ku HDP (Partiya Demokratîk ya Gelan), li Amedê, bi tevî “heft” dorhêlên siyasî ragihand wekî hevkariyeke helbijartinê ya Kurdewer ava kirine, ya ku ji partî, komele û kom û komikan dihatin pê. Bi vê daxuyaniyê hewl dabûn wekî mizgîniya xêrê bidin gelê Kurd ku hemû layenên siyasî yên Bakurê Kurdistanê, di bin banê HDPyê de hatine ba hev û tifaq û hevkariya netewî ya Kurdan bi awayekî qutebir li dar xistine. Lêbelê, xelk û alem pê dizanî ku HDP, di qonaxeke nêzîkî helbijartinan de vegotina “Yekîtiya Netewî” hem ji bo berjewendiyên xwe yên siyasî û hem jî ji bo devê layên û derdorên siyasî yên Kurd –yên qaşogiravî derveyî vê siyeseta Tirkîyeperwer– şêrîn bike, bi kar dianî, ev yeka hanê hişt ku partî yan derdorên siyasî yên Kurd, dev ji hemû bîr û bawerî û boçûnên xwe yên “netewî û dij-mêtinger” berdin, xwe jî, gelê xwe jî bixapînin, yek bi yek bi dora HDPyê, ango Tirkîyeperweriyê bikevin. Rêya wan wê hingê jî vekirî bû, niha jî vekirî ye!

Belam, di vê “Yekîtî”yê de tişta herî balkêş ne ew e wekî HDP di bîr û bawerî û armanca xwe de bi pêdagir û lihevkirî ye, tew em dikarin bibêjin ku HDP, asta bîr û baweriyên xwe yên navend-Tirkîyeperweriyê, di van helbijartinên bê de bilindtir kiriye; siyasetmedarên Kurd, ji hemû qonaxên siyasetê bêhtir, di bin pêşengiya vê siyasetê de fena xulaman tevdigerin, ango, alozî, ne di pêşniyarbirina bo yên wekî Hesen Cemalê neviyê Cemal Paşayî de ye ne jî di helwêstê de. Bazar, bazara Tirkîyeyeke demokratîk e, hemû ev keft û left ji bo veguhertina rûçikê dewleta mêtinger e wekî dawdoza Kurdan bi rê û dirbên “demokratîk” ji holê rake. Ew dawdoza ku ji Serhildana 1925an û vir de hêza dehfdêr ya avakirina bîr û boçûna dewleteke serbixwe û bidestxistina mafên netewî ya gele Kurd bû. Niha, HDP cardin bi yekîtiyekê(!) diçe ser sindoqan, tifaqa Hur-Kemalîstan bi dengên Kurdan û bi helwêsta ku ji bêhelwestiyê der tê, bihêztir û bibandortir dibe, pirs û pirsgirêkên demokratîkkirina Tirkîyeyê bûye bar û ketiye ser milên vî gelî! Hêviya vê siyaseta dij-Kurd ew e ku, heya ku Tirkîye nebe dewleteke demokratîk, dê pirsgirêk û aloziyên Kurdan jî çareser nebin! Lewre hem dewleta mêtinger û hem jî partiyên ku bi desten wan hatine avakirin, baş pê dizanin ku motîfa herî bihêz neteweperwerî ye, hîn jî wisa ye û dê hertim wisa be!

Belê, çawa dibe ku partî û derdorên siyasî yên Kurd yên ku xwe dûrî vê vegotinê bi rê ve dixin —û dixistin— bi partiyeke “Tirkan” re ya ku “Ala Rengîn” wek ala xwe nabîne û li dijî Ala Rengîn, li dijî tifaqa Kurdan, li dijî neteweperweriyê, li dijî bîr û boçûna serxwebûnxwaziyê, her weha li dijî dewleta Kurdan —her li kuderê jê bê behskirin yan avakirin!— hevkariyê dike, jê wêdetir, xulamtiyeke din î nûjen û lihevkirî ji gelê xwe re dixwaze ku bixwe jî dibe xulamek? Wek ku PDK-BAKUR, di daxuyaniya xwe ya navborî de jî anîbû zimên wekî HDP, ji bo dawîtirîn armanca xwe hemû layenên din yên di nava tifaqê cî girtine, fena alaveke berdeste bi kar tîne, bêyî ku tiştekî bide wan.

Ev e ne tifaq e, ev e binpêkirina mafên netewî yên Kurdan e. PDK-BAKUR banga xwe dubare, sêbare dike wekî gelê Kurd ê birûmet, di helbijartinên bê de piştgiriyê nede tifaqa dij-Kurdan û helbijartinan boykot bike. Xwe ji vê qeşmertiya demokratîkkirina Tirkîyeyê bi dûr bixe û çi demokrat, çi sosyalîst, çi liberal, hifza xwe ji Romiyan bike, li mîrateya Xanî, Nehrî, Şêx Seîd û Barzaniyê Nemir xwedî derkeve!

PDK-BAKUR