SALVEGER

15.03.2021

Em di salvegera koça wî ya dawî de Sekreterê Giştî yê partiya me têkoşer Dr Xetîb Demîralp (Xalid Şervan) bi rêzdarî û dilovanî bibîr tînin.

Dr. Xetîb di sala 1955an de li gundê Kanîreşê ya bi ser Çewligê ve ji dayik bû. Ew di xortaniya xwe de, dema ku hê dibistana lîseyê dixwend, cihê xwe di nav refên partiyê de girt û ji wê rojê heta roja ku nexweşiya penceşêrê ew di temenê 44 salî de ji heval û hogirên wî qetand, temama jiyana xwe di rêya serxwebûn û azadiya Kurdistanê de derbas kir.

Dr. Xetîb xwedî bîr û baweriyeke xurt û kesayetiyeke têkoşer bû. Lewra, piştî derbeya leşkerî ya 1980an, ku dewleta tirk xwest ew dîl bigire, Dr Xetîb xwe radest nekir, bi salan li Amedê jiyana mehkûmî derbas kir. Lê di wan mercên gelek giran de jî terka Kurdistanê nekir û xebata xwe ya şoreşgerî domand. Ew di 1983an de, di encama operasyoneke li dijî partiya me bi tevî gelek endamên din hat girtin û di zindana Amedê de tûşî zilm û êşkenceya dewleta tirk bû. Ew di 1985an de carek din bi tevî hevalên xwe hate dîl kirin, êşkence dît, di zindana Amedê de ma, û di 1986an de ji zindanê derket.

Bi tevî hemî astengî, alozî, zilm û sitema dewleta dagirker, Dr Xetîb yek rojek jî dest ji têkoşînê ber neda. Ew di sala 1987an de, ji bo ji nû ve birêxistina partiyê, bi biryara Komita Navendî wekî Sekreterê Giştî yê berdem hate erkdarkirin. Dr Xetîb di wan mercên gelek aloz û metirsîdar de, bi zîrekî, fedakarî û dilsoziya xwe, li seranserê Bakurê Kurdistanê geriya, endam û kadroyên heyî carek din li hev civand, komiteyan saz kir, û gelek kadroyên berê yên rêxistinên Kurdistanî tevlî rêzên Partiyê kir. Bi wî awayî, ew hêşt ku di demeke kurt de partiya me carek din çalak bibe û derkeve ser dika siyasetê. Herweha, ew xwe gihand nifşên nû jî, û ji nav keç û xortên welatperwer kadroyên nû perwerde kirin.

Di bin pêşengiya Dr Xetîb de, Partî di warê siyasî, rêxistinî û leşkerî de gihaşt asteke bilind û di 1991an de bi beşdarbûna hejmareke mezin ya nûneran kongreya xwe ya 4emîn li dar xist. Ji ber ku ew erka xwe ya berdemî bi serkeftin pêk anîbû, endamên Kongreyê jê daxwaz kirin ku erka xwe wek Sekreterê Giştî berdewam bike. Lê, ew bi dilnizmî erka xwe radestî hevalên xwe kir û wekî kardoyek xebata xwe domand.

Hezar mixabin ku, demek kurt piştî Kongreyê, Dr Xetîb nexweş ket, di 15ê adara 1993an de li Amedê çû ser dilovaniya xwe û bi sedan heval û hogirên xwe dilşikestî û xemgîn hêşt.

Lêbelê, ew têkoşerî, dilsozî û biryardariya ku Dr Xetîb bi xebat û kiryarên xwe 28 sal berê danî holê bû mîrateke mayînde ji bo kardoyên nû yên Partiyê. Ji bo me cihê şanaziyê ye ku, wê dilsozî û biryardariya ku Dr Xetîb ji Seîd Elçî û hevalên wî wergirtibû îro jî ji aliyê heval û şagirtên wî ve tê berdewamkirin.

Dr Xetîb evîndarê Kurdistanê bû. Ew têkoşerekî wêrek û pêşengekî bêhempa bû. Li hember tu astengî, alozî û gefên dijmin tu car netirsiya û bi şûn ve gav neavêt. Lê tirsek wî hebû, ku Kurdistana azad nebîne. Lewra, hîn di xortaniya xwe de, di sala 1977an de li Amedê, helbestek nivîsî ku tê de wesîyet li hevalên xwe dike ku eger ew nebîne jî bila doza wî li erdê nehêlin û Kurdistanê azad bikin.

Bila giyanê te yê pîroz şad be Doktor, hevalên te doza te li erdê nahêlin.

Dil bi xwîn û dil bi birîn im,

Ditirsim bimirim ez nebînim

Hun Kurdistanê di bin destan derînin

Çûm Amedê çûm Amedê

(1977, Amed)

11.07.2017

Kurdistanîyên hêja,

Partîya me 52 sal berê ji alîyê şehîdê gorbihişt Seîd Elçî û çar hevalên wî yên qedirbilind ve, roja 11ê Tîrmeha 1965an li Amedê hat damezrandin. Ji wê rojê heta îro Partî, xwe wekî partîyeke netewî û demokratîk dide pênasîn, azadîya her çar parçên Kurdistanê diparêze, û nirx û têkoşîna lehengê netewî nemir Mele Mistefa Barzanî ji bo xwe wekî rêbaz dipejirîne.

Partîya me, di 1965an de wekî yekemin sazîya netewî ya siyasî ya nûjen ya li bakurê Kurdistanê, di bin mercên gelek giran de hat damezrandin û bi fedakarîyên mezin li hember dagirker û mêtingeran dest bi têkoşînê kir. Bi tevî hemî asteng û bêderfetîyan, Partî di demek kurt de li seranserê bakurê Kurdistanê deng veda, rêxistina xwe pêk anî û bû hêvîya azadîyê ya gelê me.

Bêgûman neyarên gelê Kurdistanê jî ji bo Partîya me ji holê rakin bi her awayên qirêj êrîş birin ser wê. Şehîdkirina serokê Partîyê Faîk Bûcak yek ji wan êrîşên bêbextane bû. Zindankirin û darizandina sekreterê giştî Seîd Elçî û kadroyên partîyê jî herweha bi mebesta temirandina agirê azadîxwazîyê bû. Lêbelê, wan lehengên Kurdistanê bi serbilindî mafê kurdan û Kurdistanê parastin û dadgeha dagirkeran bir sere wan de anîn xwarê. Ew helwesta dîrokî ya Seîd Elçî û hevalên wî, ji bo her kurdeke welatparêz dê her dem bibe cihê serbilindîye.

PDK-Bakur, bi dirêjayîya van 52 salan, tim mafê gelê Kurdistanê yê çarenûsîyê parastîye; bi hemî partî, rêxistin, derdor û kesayetîyên Kurdistanî re her dem têkilîyên birayetîyê danîye, û bi tevî her awayên êrîş û lîstokên neyarên Kurdistanê jî, ji dev ji vê doza pîroz bernedaye.

PDK-Bakur îro jî li ser rêça damezrênerên xwe yên 1965an dimeşe, û di serî de Barzanîyê nemir, ji bo pêkanîna xewna serok û rêberên gelê me ya Kurdistanek serbixwe xebata xwe didomîne.

Yan Kurdistan Yan Neman!

PDK-BAKUR