DAXUYANIYA PARTIYA ME YA DERBARÊ ÇÊKIRINA PDK’YEK SEXTE

20.06.2017

Piştî agahîyên wek dê civînek li otêlaka li Amedê bête li dar xistin da ku PDK’yek sexte bête avakirin, me pêwîst dît ku em vê daxuyanîye bi raya giştî ya welatparêz re parve bikin. Partîya me wan kesên ku di vê lîstokê de cih distînin nas dike û dizane ew xwe dispêrin kuderê. Hinek ji wan kesên hanê berê di nav rêzên partiya me de cih standibûn û piştî ku rûçikê wan eşkere bû ji partiyê hatibûn avêtin. Di nav wan kesan de, gelek tawanbarên wek yên ku pêrên ji bo alîkarîya Şoreşa Gulanê hatibû berhevkirin dizî kiribûn bigre, heta bi yên ku bi dewleta dagirker re di nav têkilîyên organîk de bûn hebûn. Hinek din ji wan kesan jî, di temenê xwe de yek rojek jî di têkoşîna kurdan de cih nestandine, yên din, welatparêzîya wan bes girêdayî alîkarîya aborî ya ji Başûr ve ye, û eger ku perê li ser wan qut bibe, gefan dixwun ku dê dev ji grûba xwe ya siyasî berdin. Van kesan çend nas û dostên xwe û hinek welatparêzên dilsoz ên ku xapandine li dora xwe dicivînîn, xwe wekî PDK didin nasîn û bi vî awayî dixwazin hinek qedr û qîmet bi dest bixin. Vanan heta duhî hevûdû bi xiyanet û dizekiyê tawanbar dikirin, lê îro ji bo berjewendiyên xwe yên şexsî carek din hatine cem hev. Ew xwe dispêrin dewleta dagirker û bi vî awayî dixwazin hebûna xwe bidomînin.

Gelê Kurdistanê hewldanên wek vanan baş nas dike. Dîyab Axa gava di tirêmbêla M. Kemal de rûdinişt, xwe wekî yekê qedirbilind didît. Lêbelê, di rastiyê de ew ketibû nav çala xiyanetê. Herweha birayên Akrewî jî di salên 1970’an de digotin ‘PDK em in’ û ji bo xatirê Sedam dev ji mafên netewî yên kurdan berdidan. Wê gavê rola Diyab Axa û Akrewîyan çi bû, îro rola van kesan jî ew e. Armanca van kesan ew e ku bêjin ‘em jî kurd in’ û bakurê welatê me heta dawiyê bê statu bihêlin. Siyaseta wan a derbarê Bakur bes ew e ku dewleta dagirker çi bide –lê ku tiştek bide- ew ê qîma xwe bi wî qasî bînin. Ji bo samîmîyeta wan a di derbarê têkoşîna Başûr jî bête fam kirin, divê mirov li wî kesî ku di civata wan de li serî rûdinê binêre. Ew kes, mirovek di asteka wisa nizim de ye ku dikariye dest dirêjê wî perê bike ku piştî nijadkujiya Helebçê ji bo pêşmergeyan û gelê Başûr hatibû berhevkirin. Ew mirovê ku perên ku ji bo kampa Mêrdînê hatibû berhevkirin û mûçeyên pêşmergeyan bi perê qelb re guhartibû û pêre wan xwaribû, îro li seriya civata wan hatiyê rûniştandin, û yên din ê li civatê, bi tevê ku vê rastiyê zanin jî, dengê xwe nakin. Ev yek bixwe dertîne holê ku ev civata hanê bi çi rengî ye. Em vê pêkhatina hanê, armanca wê û exlaqê wê dispêrin nirxandina raya giştî ya welatparêz -ew pêkhatina ku dikare wî mirovê ku di wan mercên giran de ku gelê me dihat qirkirin, karibû wê gendelîyê bike, tîne li seriya civata xwe dide rûniştandin. Begûman, pêkhatineka ku mirovek wisa di nav de qedirbilind be, û kesên din jî, bi tevê ku rastiyê dizanin, li hember tawanên wî bêdeng dimînin, bes dikare xisarê bigihîne doza Kurdistanê. Partiya me wan tawanan ne ji bîr kiriye û ne jî lê borandiye. PDK-Bakur di wê baweriyê de ye ku, xebatên yekîtîyê ku ji ber mecbûriyetê têne meşandin û li ser berjewendiyên şexsî hatine avakirin nikarin tu sûdê bigihînin dozê.

Divê bête zanîn ku, PDK-Bakur û welatparêzên kurd, heta parçeya bakurê Kurdistana me bigihîje mafê xwe yê çarenûsiyê, dê têkoşîna xwe bi biryardarî û bê tawîz bidomînin; dê vê têkoşînê jî li gor exlaqê kurdan bimeşînin, û berhemê vê têkoşînê jî dê azadiya netewa me be. PDK-Bakur, ji ber ku bi avahî û bîrdoziya xwe ve yekpare ye, bi tu partî û pêkhatinên din re yekîtiyê çê nake. Lêbelê, ew amade ye ku hevkariyê bike bi hemî sazî û pêkhatinan re yên ku mafê çarenûsiya kurdan diparêzin. Banga me ya li wan kesên navbûrî jî ew e ku, bila ji wê çalê derbikevin û bes xisarê bidin netewa me. PDK-BAKUR