DAXUYANIYA PDK-BAKUR YA DI DERBARÊ HILBIJARTINÊN TIRKIYÊ DE
30.04.2018
Wekî partiyeke Kurdistanî, demokratîk û serxwebûnxwaz, PDK-Bakur helwesata xwe ya di derbarê hilbijartinên dewleta tirk de gelek caran ji raya giştî re eşkere kiriye. Lêbelê ji ber van nîqaşên dawî yên di nav parti, grûb û derdorên siyasî yên kurdan de ku bi helkefta hilbijartinên 24ê Hezîranê tên kirin, em pêwîst dibînin ku carek din helwesta xwe bidin bîra hemî aliyên têkildar.
Dewleta tirk dewletek mêtinger û dagirker e, bakurê Kurdistanê bi darê zorê dagir kiriye û hebûna wê ya li Kurdistanê ne rewa ye. Herweha, dewleta tirk li ser bingeha înkarkirina netewa kurd û axa Kurdistanê hatiyê damezrandin û tunekirina netewa kurd ji bo wê armanca sereke ye. Ev armanca wê jî, ev nêzîkê sed sal in ku, hem di destûr û yasayên wê de û hem jî di kirin û gotinên berdevkên wê de tê eşkere kirin. Desthilatiyên dewleta tirkan yên heta îro, çi partiyên qaşo çepgir bin, çi jî yên rastgir yan jî îslamî bin, di mijara kurd û Kurdistanê de helwesta wan hemiyan her yek bûye, ku ew jî înkarkirin û tunekirina netewa kurd e.
Tirkiye ne dewleta kurdan e. Lewra, hilbijartina endamên parlamentoya dagirkeran û seroke dewleta wan jî ne karê kurdan e. Lewra, tevlêbûna kurdan a hilbijartina parlamantoya dewleta tirkan wê bihêle ku ev rejima dagirker û mêtinger bi destê kurdan xurttir bibe û bête rewakirin. Karê kurdan ew e ku, li ser bingeha doza netewî, yekrêziyê di nav aliyên siyasî yên Kurdistanî de pêk bînin, dengê xwe bilindtir bikin û ji bo bidestxistina mafê desthilatdariyê ya li ser welatê xwe xebat bikin.
Bi tevî van bîr û rayên hanê, PDK-Bakur bawer dike ku hilbijartinên dewleta dagirker jî, di rêya tekoşîna rizgariya netewî de, dikarin wekî derfetek bêne bikaranîn. Aliyên siyasî yên Kurdistanî li ser bingeha mafê çarenûsî dikarin yekrêziya xwe pêk bînin û ji bo boykotkirina hilbijartinên 24ê Hezîranê xebata propagandayê bikin. Ev xebat wê bihêle ku di nav gelê Kurdistanê de hişyarîya netewî bilindtir bibe, û herweha, pirraniya rêjeya boykotê wê daxwaz û viyana gelê Kurdistanê bi awayekî şênber derbixîne holê.
PDK- BAKUR