DESTKEFTÊN BAŞÛRÊ KURDISTANÊ PÎROZ IN

13.03.2022

Komara dagirker a Îranê şevê din bi rokêtan êrîşî ser Hewlêra paytexta Başûrê Kurdistanê kir. Îranê beriya niha jî gelek caran bi alîkariya hêzên xwe ên kirêgirtî êrîşî Başûrê Kurdistanê kiriye. Lê ev cara yekemîn e ku rasterast ji nava sînorên xwe rokêtan davêje Hewlêrê û êrîşeke wiha hovane pêk tîne û berpirsyariya wê jî li xwe digre. Piştî vê rûdanê em dibînin ku Îran derbasî qonaxeke nû a êrîşkariyê bûye.

Ji bo parastina berjewendiyên xelkê Kurdistanê, nehiştina bandora hêzên kirêgirtî ên ser bi Îranê ve û şikandina bandora Îranê di siyaseta Iraqê de, Serkirdayetiya Siyasî a Başûrê Kurdistanê roleke karîger dibîne û wiha xuya ye ku ev yek jî bûye sedema vê êrîşê.

Dewleta Federe a Başûrê Kurdistanê navenda aramî û bihevrejiyanê ye û berê wê li nirxên cîhana azad e û ji bo vê dibe armanca êrîşên Îrana dagirker û paşverû.

Yek ji armancên êrîşê jî saziya ragihandinê Kurdistan24 e û nîşan dide ku dewleta Îranê dijminê nirxên mirovî ye. Divê Îran û dagirkerên din baş zanibin ku wê netewa Kurd li hemû perçeyan bi tekoşîna xwe a serxwebûnê, nirxên mirovatiyê biparêze.

Partiya me PDK-Bakur careke din dûpat dike ku ew li pişta gelê Başûrê Kurdistanê û serokatiya wê a siyasî ye û bang li Kurdistaniyên her çar perçeyan dike ku xwedî li destkeftên Başûrê Kurdistanê derkevin.

PDK-BAKUR