MELA MUSTAFA BARZANÎ

01.03.2021

Em, wek Partiya Demokrat a Kurdistanê- Bakur (PDK-Bakur), di 42emîn salvegera koçkirina wî de, serokê neteweyî Mele Mistefa Barzanîyê nemir carek din bi giramî bi bîr tînin.

Bê gûman, Mêle Mistefa Barzanî ne tenê lehengekî bêhempa, qumandarekî serkeftî û serkirdeyekî zîrek bû; ew herweha ji bo her Kurdekî li ser rûyê cîhanê hêviya azadî û rizgariyê jî bû. Hemî Kurd û Kurdistanî bi dil û can û bi bawerî piştgirî dan têkoşîna wî ya ji bo Kurdistana azad û aram. Cihê şanaziyê ye ku Mele Mistefa di temama jiyana xwe de alaya Kurdan her tim bilind kir û bi tevî her astengî û bêîmkaniyan jî nehêla agirê azadiyê li ser axa Kurdistanê vemire. Bi vî awayî, ew hem doza Kurd û Kurdistanê hilgirt ser milên xwe û hem jî hêşt ku ev doz di serdema nûjen de li ser lingan bimîne, ber bi pêş ve here, bikeve rojeva cîhanê û rêz lê bê girtin.

Mele Mistefa Barzanî neteweya Kurd ji nemanê rizgar kiriye û hêştiye ku îro parçeyek ji welatê me bi encama wê biryardariyê azad be û doza me ya neteweyî li sernaserê Kurdistana mezin berdewam be. Ji ber van taybetmendiyên xwe, Mele Mistefa Barzanî di çavên her Kurdek xwenas de gihaştiye asta serokê neteweyî û dê her tim weha bimîne.

Barzanîyê nemir dizanibû û bi her kesî dida zanin ku, hebûn û azadiya gelê Kurdistanê bi rizgarkirina axa Kurdistanê ve girêdayî ye, û lewra jî diruşma “Yan Kurdistan Yan Neman” diyariyê tevgera rizgarîxwaziya Kurdistanê kiriye.

PDK-Bakur jî, wekî her Kurdekî dilsoz, xwedî li mîratê Mele Mistefa Barzanîyê nemir derdikeve, rêbaza wî wekî kilîla rizgariya Kurd û Kurdistanê dibîne, û li ser wê rêbazê xebat û têkoşîna xwe didomîne.

PDK-BAKUR