NEWROZ PÎROZ BE GELÊ ME YÊ TÊKOŞER…

21.03.2018

Gelê Kurdistanê carek din di rewşeka gelek xembar de pêşwaziya cejna Newrozê dike. Ew êrîşkariya hovane ya dewleta tirkan ya van du mehên dawî, mixabin bi dagirkirina herêma Efrînê ya rojavayê welatê me encam da. Niha ew herêm bi destê artêşa tirkan a dagirker û çeteyên xwefiroş tê wêrankirin, gelê me tê koçber kirin û malê wan tê talankirin.

Balkêş e ku, bi tevî ku vê êrîşakariya hovane û bêperwa ya dewleta tirkan li pêş çavên hemî cîhanê qewimî, wan dewletên ku xwe wekî xwediyên nirxên demokarsiyê û mirovayêtiyê dibinin, bes temaşa vê destdirêjiyê kirin, çav û guhên xwe li kuştina bi sedan sivîlan girtin. Dewleta tirkan ne hat sekinandin ne jî hat şermezarkirin.

Dagirikirina Efrînê, herwekî ya Kerkûkê, carek din eşkere kir ku mêtinger tu car naxwazin rê li ber azadiya kurdan vebe û ji bo astengkirina vê yekê amade ne ku kiryarên herî qirêj û bêperwa pêk bînin. Lê divê her kurdek êdî vê rastiyê baş bibine ku, dema berdevkên dewleta tirkan hebûna siyasî ya kurdan wekî “pirsa man û nemana dewleta xwe” binav dikin, ji alî xwe ve rastiyê dibêjin.

Rast e, hebûna kurdan, ango dewletbûyîna parçeyek ji axa Kurdistanê jî, wê bibe destpêka hilweşandina van dewletên dagirker û faşist.

Gelê Kurdistanê di têkoşîna xwe ya dîrokî ya rizgariyê de gelek karesatên mezintir û xirabtir derbas kiriye û dîsan jî li ser piyan maye. Lewra, herçend şikestina Efrînê niha li seranserê Kurdistanê bûbe cihe xemgîniyê jî, di dawî de şikestina mezin wê bibe para dagirkeran.

Piştî van rûdanên dawî , divê gelê Kurdistanê Newroza îsal wekî helkefta pêkanîna yekrêziya netewî bibîne û ji bo têkoşîneka dijwar xwe amade bike. Lewra divê neyê jibîrkirin ku Newroz ji bo kurdan salvegera serhildana Kawayê Hesinker e, û roja rizgarbûna gelê me ye.

PDK-BAKUR