DAXUYANIYA PARTIYA DEMOKRAT A KURDISTANÊ-BAKUR YA DI DERBARÊ HILBIJARTINÊN DEVERÎ DE

26.10.2018

Bi helkevta hilbijartinên deverî yên ku dê dewleta tirkan di 31ê Adara 2019an de li seranserê Tirkiyê û li bakurê Kurdistana dagirkirî li dar bixe, em wekî Partiya Demokrat a Kurdistanê-Bakur, dixwazin carek din helwesta xwe ya di vê derbarê de bi raya giştî û hemî aliyên siyasî yên Kurdistanî re parve bikin.

Wekî tê zanîn, PDK-Bakur ji roja ku hatiye damezrandin ve, li dijî dagirkerî û mêtingeriyê siyasetek neteweyî û rizgarîxwaz pejirandiye. Herweha PDK-Bakur, pirsa Kurdistanê wekî pirsa bidestxistina mafê desthilatiyê ya li ser axa Kurdistanê dibîne. Ji ber vê fam û baweriya xwe ya neteweyî, partiya me her dem hilbijartinên parlamanetoya dewleta tirkan û referandûmên wan boykot kiriye û encamên wan jî nas nekiriye.

Lêbelê, hilbijartinên deverî divê bi awayeke din bêne nirxandin. Şaredarî saziyên deverî ne ku rasterast bi gel re rûbirû dibin û heta dereceyekî ji pergala nerewa ya dagirkeran parastî ne. Herweha, bi rêya van saziyan derfetek din ji siyaseta neteweyî re çêdibe ku peyamên xwe bigihîne gelê Kurdistanê û rêvebiriyek li gor rêbaza xwe dane holê.

Ji ber van egerên jorîn, PDK-Bakur biryar daye ku ew ê li bakurê Kurdistanê piştgirî bide berbijêrên welatparêz yên ku li ser xeta Kurdistanî tevdigerin. Herweha, PDK-Bakur bang li hemî partî, rêxistin, sazî û derûdorên siyasî yên Kurdistanî dike ku di warê hilbijartinên deverî de bi yekrêzî tevbigerin, hêzen xwe bikin yek, bi hev re berbijêrên welatparêz destnîşan bikin û ji bo serkevtina wan berbijêran xebatê bikin.

PDK-Bakur