JI BO RAYA GIŞTÎ Û ÇAPEMENIYÊ

15.04.2020

Pêşmergeyê berê yê PDKÎ Mistefa Selîmî ku roja 27ê Adarê ji girtîgeha bajarê Seqiz reviya û derbasî Başûrê Kurdistanê bû, li wir hat girtin û bo desthilatdariya Îranê hat radestkirin. Piştî vê radestkirinê, îdamkirina wî birîneke kûr di dilê miletê Kurd de vekir.

Li gorî hiqûqa navneteweyî penahendeyên ku biryara sêdaredanê li wan hatibe birîn û di bin metirsiya îşkenceyê de bin, nabe ku bêne radestkirin.

Eger Mistefa Selîmî, ji wan mafên ku hiqûqa navneteweyî bo kesên di rewşa wî de diyar kirine, sûd wergirta, dibe ku îro di nava me de sax bûya. Kesên ku berpirsên radestkirina mehkûmekî sêdaredanê ne, di heman demê de hevparên vê kuştinê ne jî.

Raya giştî ya Kurd, li hêviyê ye ku hikûmeta Kurdistanê, hevparên vê tawanê darizîne. Eger ev tawan bê ceza bimîne, wê ziyaneke mezin bide tekoşîna Kurdistanê û bibe sedema çêbûna guman û bêbaweriyê di nava partiyên Kurdan de.

Bi vê boneyê em ji malbata şehîd Mistefa Selîmî, PDKÎ û tevahiya hêz û rêkxistinên Kurdistanî re diyar dikin ku em bi gelê Rojhilatê Kurdistanê re ne.

PDK-BAKUR