LI AMEDÊ 61EMÎN SALVEGERA DAMZERANDINA PDK-BAKUR
PDK-BAKUR, LI AMEDÊ 61EMÎN SALVEGERA DAMZERANDINA PDK-BAKUR BI BERNAMEYEKE TÊRÛTIJE, LI WARGEHA KU PDK-BAKUR LÊ HATIYE DAMEZRANDIN, PÎROZ DIKE.
Author: reveberi
JI BO RAYA GIŞTÎ
PDK-Bakur, êrişa li ser mala serokê Herêma Kurdistanê birêz Nêçîrvan Barzanî hatîye kirin bi tundî şermezar dike. Eve ne cara yekem e ku Îran û alîgirên xwe yên derveyî yasayî li Îraqê bi dron û mûşekan êrişî Kurdistanê dikin.Li gel ku herêma Kurdistanê ne teref e di şerê navbera Amerika-Îsraîl û Îranê de, û Kurdistan her dem aligirê aşîtiyê ye, lê dîsa jî dibe armanca êrîşên Îranê û alîgirên wê yên li Îraqê. Îranê roja 24ê adarê bi mûşekan êrîş bir ser xaleke Pêşmerge û di encam de 6 Pêşmerge şehîd ketin û 30 Pêşmerge jî birîndar bûn. Êrîşên Îranê û alîgirên wê yên li Îraqê xeternak in. Parastina tevaya Herêma Kurdistanê berpirsîyarîya hikûmeta federal ya Îraqê ye, lê mixabin ev berpirsîyarî nehatîye bicîhkirin bi taybet li dij komên terorîst yên li Îraqê. PDK-Bakur van êrîşên dijminane yên li dijî Herêma Kurdistanê bi tundî şermezar dike.
Bijî Pêşmerge û Bijî Kurdistan!
PDK-Bakur
SERSAXÎ (NECAT ONUR)
Em bi xemgînî radigihînin ku endamê hêja yê partiya me Necat Onur yê xelqê Cizîra Botan çû ser dilovanîya xwe. Ew jiyananeka bi kurdewarî û welatperwerîyê têr û tije derbas kir û bi serbilindî ji cîhanê koç kir. Ew ê hertim di bîra me de be.
PDK-Bakur
SERSAXÎ – KAK IDRÎS (EVDIREHÎM YAWÛZ)
Heval û hogirê me yê bi salan, endamê Partiya me PDK-BAKUR, KAK IDRÎS (EVDIREHÎM YAWÛZ), li Rihayê koça xwe a dawîn kir. Kak Idrîs, wek xemxûrekî welêt, di sala 1977an de li Cizîra Botan tevlî refên Partiyê bibû ku di tevahiya jiyana xwe de her tim ji bo Kurd û Kurdistanê heya roja dawîn jî bê rawestan kar kiribû. Em wek PDK-Bakur, sersaxiyê li endamên malbata wî, li endamên Partiyê û hemû hezkiriyên wî dikin. PDK-BAKUR li niştimanperwerî û têkoşeriya wî ya ku ji bo me wek mîrateyekê ye, dê heya serxwebûna Kurdistanê xwedî derkeve. Xwedê rehma xwe lê bike, cihî wî bihûşta rengîn be.
PDK-Bakur
59 SALIYA PDK-BAKUR LI GELÊ KURD Û KURDISTANÊ PÎROZ BE
PDKT, 59 sal berê di 11ê Tîrmeha 1965an de hat damezrandin.
Partiya Demokrat a Kurdistanê ya Tirkiyeyê (PDKT)di 11ê Tîrmeha 1965an de li bajarê Amedê, navenda welatê me, hat damezrandin. Yekemîn damezrênerên Partiya me şehîd Seîd Elçî, nemir Şerafedîn Elçî û Omer Turhan, Derwêşê Sado (Derviş Akgûl) û Şakir Epozdemîr bûn. Piştî damezrandina wê, bi hewldana nemir Fehmî Bîlal sekreterê Şêx Seîd Efendî ku di damezrandina partiyê de roleke aktîf hebû, Faîk Bucak bi merasima sondxwarinê ya ku li Otela Tûrîstîk a Diyarbekirê hat lidarxistin, wek Serokê PDKTyê hat destnîşankirin.
Piştî Komkujiya Dêrsimê ya 1938an û Doza 49an û piştî derbeya leşkerî ya 1960î Partîya me ya ku 11ê Tîrmeha 1965an de hat damezrandin yekemîn partiya siyasî ya netewî ya Kurdistanê ku di qada siyasî de cihê xwe girt.
PDKT partiyeke demokratîk a navendî bû ku li Bakur pêwîstiya rêxistinbûneke cuda derxist pêş û mafên neteweyî û demokratîk parast.
Beriya ku partiya me sala yekem a damezrandina xwe temam bike, hêzên k
ûr ên dewletê serokê me parêzer Faîk Bucak di encama sûîqesteke siyasî de qetil kirin. Piştre serokê nû yê partiya me Seîd Elçî, di sala 1967’an de hat girtin û piştî 70 roj lêpirsîna bi îşkenceyê hat sirgûnkirin. Tevî van hemû neyînîyan partiya me li herêmên wek Amed, Farqîn, Êlih, Botan, Sason, Xerzan, Baykan, Bedlîs, Sêrt, Tetwan, Mûş, Bulanik (Kop), Licê, Patnos, Wan, Hîzan, Siwêreg, Cizîr, Nisêbîn û Qoser. Li Enqere û Ewropayê nûnerên xwe destnîşan kirin.
Di Hezîrana 1971ê de Seroke Giştî yê PDKT Seîd Elçî bi Mihemedê Begê re di encama sûîqesteke siyasî de hat qatilkirin û şehîd bû. Ev derba duyemîn bû li partiya me. Tevî hemû zehmetiyan jî Partiya me bi zanebûna erk û berpirsyariyên xwe yên Kurdistanî tevdigeriya.
Em, partiyeke netewî û demokratîk in. Partiya me modern e û nirxên gelê me dihewîne.
Têkoşîna sivîl, demokratîk û aştiyane ya ku pêwîstiya gelê Kurd heye wê ji bo daxwaz û daxwazên gelê me şert û mercên pêwîst biafirîne. Di xebatên siyasî û rêxistinî de hêz û tundiyê bi temamî red dike.
-Di Îlona 1992 de, Partiya Demokrat a Kurdistana Tirkiyeyê (TKDP) ku di sala 1965an de hat damezrandin, Platforma Yekitiya Ala Rizgarî, Platforma Yekîtiya Netewî (Bergeh), koma ku ji Rizgarî derket û hin kadroyên serbixwe, di Kongreya Yekîtiyê ya ku li dar xist de bûn yek.
-Di Kongreya a ku di Mijdara 1994an de hat lidarxistin, navê Partiyê li ser pênaseya erdnîgariya siyasî bû Partiya Demokrat a Kurdistan – Bakur (PDK-Bakur).
-PDK-Bakur sîwana welatparêziya Kurdewarî û Kurdayetiyê ye. Di bin vî banî de refên me ji hemû Kurdan re vekirîne. Em amade ne ku bi hev re xizmeta gelê xwe bikin.
Partiya me ku di sala 1965’an de hatiye damezrandin, xwedî dîrokeke dirêj a têkoşîn û mîsyonê ye. Partiya me di nava tevgera demokratîk a neteweyî de xwedî cihekî girîng e. Em bang li gelê xwe dikin ku di nava refên partiya xwe de bicivin û têbikoşin.
-Bi boneya 59’emîn salvegera damezrandina PDK-Bakur em, pêşengên xwe yên wek Şehîd Faîk Bucak, Seîd Elçî û hemû şehîdên Partiyê bi minet û rêzdarî bi bîr tînin. Rehma Xwedê li hemû şehîdên Kurdistanê be.
11.07.2024
PÊNCÎ Û YEKEMÎN SALVEGERA KOÇKIRINA SEROK SEÎD ELÇÎ
Wek PDK-Bakur, em avakar û serokê partiya me Seîd Elçîyê pakrewan, di pêncî û yekemîn salvegera koçkirina wî de bi hestên şoreşgerane bi bîr tînin. Xemxûr û têkoşerê gelê Kurd Seîd Elçî, yê ku her tim di rêya serxwebûna welatê xwe de ji bo azadiya gelê xwe têkoşiya, bi bîr û baweriya xwe ya hêzdar, rêya me a dirêj a ji bo serxwebûnê ronî kir. Dilsozîya wî, ked û kespa wî ya bêhempa û a nayjibîrkirin, ji bo me PDK-Bakurîyan bû nexşerêyeke têkûz û sermedî.
Şehîd namirin!
Bijî Kurd û Kurdistan!
Bijî PDK-Bakur!
DAXÛYANÎ JI RAYA GIŞTÎ RE!
Demek dirêj e ku di navbera alîyên PDK-Bakur de li ser esasê pêkanîna yekîtîya rêxistinî ya partiyê dan û stendin berdewam bû. Cihê kêfxweşî û şanazîyê ye ku îro ev pêvajo gihaye qonaxek bilind, û biryarayekîtiyê hatiye standin.
Rayedar û alîgirên du alîyên PDK-Bakur,gihane wê bîr û rayêku divê PDK-Bakur di demek nêzîk deyekîtîya xwe ya rêxistinî pêk bîne û bi kongreyek giştî vê yekîtiyê mîsoger bike.
Em her du alîyên PDK Bakur, gihaştine wê bîr û rayê ku divê PDK-Bakur bi siyasetek serbixwe û bi berpirsiyarîyek neteweyî û Kurdistanî, bi destpêk û rûpelek nû xwe bîne ser hev û bi xebata xwe hêvîyên gelê bakurê Kurdistanê û tevgera azadîxwaza miletê Kurd geştir û xurttir bike.
Em hewl didin û dixwazin bi kongreyek giştî hemî kes û alîyên ku xwedî li mîrata PDKT ya 1965an û hetanî îro derdikevin bînin cem hev û bi Partiyeke xurt ruh û giyanê kedkar û cangorîyên PDK-Bakur şad bikin. Em vê helwestê wekî gaveke dîrokî bi nav dikin.
Eşkere ye ku dema burî zirarek mezin da PDK Bakur û tevgera sîyasîbi şêweyek gistî. Lewra, bi navê her du alîyên PDK Bakur, em xwe wek yek ji şirîkên lawazkirin, hêvîşikandin û bê alternatîf hîştina bakurê Kurdistanê dibînin û bêyî ku terefekî din gunehbar bikin, lêborîna xwe ji miletê Kurd dixwazin.
Hêjayê gotinê ye ku, alîyekî PDK-Bakur li gel hemî şêweyên peywendî, daxwaz û bangên me, mixabin ku di derbarê mijara yekîtîyê de tu bersivek fermî dîyar nekirîyê û di heyva nîsana 2024an de bi logoyek cûda daxûyanîyek belav kirîye.
Banga me li hemû kedkar û alîgirên ku li mîrata PDK-Bakur xwedî derdikevin ev e:
Werin em bi hev re ji vê rewşa aloz a li bakurê Kurdistanê re bibin derman. Em bi hev re rêxistin û sîyaseta PDK-Bakur xurttir bikin û doza neteweyî li bakurê welatê xwe bihêztir bikin.
4 Gulan 2024
Komîteya Yekîtîya PDK-Bakur
Partîya Demokrata Kurdistan – Bakur
PEYMANA LOZANÊ NAYÊ QEBÛL KIRIN!
JI BO RAYA GIŞTÎ YA KURDISTANÊ
PEYMANA LOZANÊ NAYÊ QEBÛL KIRIN!
Gelê Kurd û welatê wan Kurdistan sedsal berê, ji aliyê serdestan ve, bi rêya binpêkirina pîvekên hiqûqî û sincî, mîna serfên ku di navbera serdestan de bi axê re bihêne kirrîn û firotin, bi peymanekê hat perçekirin. Axa pîroz a Kurdistanê, bêyî ku guh bidin Kurdan, bi armanca ku Kurdan yekcarî ji holê rakin, di navbera dewletan de hate parvekirin. Kurd bi demê re li Tirkîyeyê, anegorî pêwistiya benda 66an ya makezagonê, wekî Tirk hatin pejirandin û di encama vê de jî ji hemû nimanên siyasî, ji mafê xweçarenûsîyê bêpar man û çand û zimanê wan hat qedexkirin. Di bin navên wek “Serperiştiya Gelemper”, “Zagona Cengî” û “Rewşa Derasayî”, Melhezaya Îslehetê a Şerqê ya ku di sala 1926an de ketibû rewacê, heya bi sala 2002yan jî dom kir. Dîsan jî, derveyî mijareyê li Tirkîyeyê cihêkariya nijadî ya li hemberî Kurdan bi awayekî tûndûtûj berdewam kir. Wek ku raya giştî a Kurdan pê agahdar e, piştî çend rojan sedsaliya Peymana Lozanê bi dawî dibe. Peyman, di navbera biserkeftîyên Şerê Cîhanê yê Yekem û Hiqûmeta Enqereyê de hatibû îmzekirin û pê re pê re Komara Tirkîyeyê hatibû damezrandin. Bi tevî ku di nave wê de peyva “aşitî” cih jî digirt, peymana navborî ji bo me Kurdan bes bûbû mirin, qirqirin, şer û pevçûn, koçberî û zindan. Di pêvajoya îmzekirina peymanê de bi tu awayî pûte bi gelê Kurd nehatibû kirin, lêbelê, piştî şerî, li Rojhilatê Ewrûpayê û li Rojhilata Naverastê gelek dewlet ava bûbûn û ji bo gelên li wê nexşeyê (ji bilî Kurdan), rêya serxwebûnê jî vebûbû.
Cihê heyr û pêkenînê ye ku îro ro, li Stenbolê şaredariyeke CHPyê ya ku di helbijartinên çûyî de li ser navê Partiya Çepa Kesk dengê Kurdan xwestibûn, sedsaliya Peymana Lozanê bi pêşengeheke taybet ya bi sernavê “Di 100. Saliya Xwe de Lozan: Aşitîya Bêdawî” pêşwazî dike û dîsan panelên bi navê “Sedsala Aşitiyê” li dar dixe. Kurdên dewletnexwaz (yan jî yên dijberî dewleteke Kurdan) li Lozanê paradigmaya bizava xwe didomînin û dixwazin Lozan, li ser hişûbîra neteweya demokratîk, ji nû ve bê nîqaş kirin.
PDK-BAKUR bi boneya sedsaliya îmzekirina Peymana Lozanê ya rûreşiyê, bang li gelê Kurd dike wekî xwedî li bîr û baweriya serxwebûnxwaziyê derkeve û peymanê û dijayetiya serxwebûnxwaziyê pûç bike. Her weha PDK-BAKUR, dide zanîn ku piştgiriyê dide dawûdoza ku bi navê DIAKURDê (Konfederasyona Kurdên Diasporayê) li Komara Tirkîyeyê hatiye vekirin.
Divêt gelê Kurd anegorî vîna xwe bijî!
PDK-BAKUR
ERDHEJ
Pîştî erdheja ku bakurê rojavayê Kurdistanê wêran kir û bû egera bi hezaran kuştî û birîndaran, endamên PDK-Bakur jî çûn bi hawara qurbaniyan ve. Bila serê gelê me sax be.
PDK-Bakur
CELADET ELÇÎ
Parêzer Celadet Elçî, kurê gorbihuşt Seîd Elçî yê damezrêner û serokê pêşîn yê Partiya me, piştî têkoşaneka dirêj ya bi nexweşîna penceşêrê re, mixabin di temenê xwe yê ciwan de çû ser dilovaniya xwe. Celadet Elçî, li gundê xwe yê bi ser Çewligê ve, ji alîyê heval, hogir, malbatiyên xwe û hejmarek mezin a welatparêzên kurd ve hate birêkirin.
Em hêviya xwe ya sersaxiyê ji xuşk û birayên wî û hevalên wî re radigihînin.
Bila cihê wî bihuşt û gora wî bi ronahî be.
PDK-Bakur